Aedados Kontentes
De Hernán Rodriguez Fisse1
La Universidad de Harvard efektuó una investigasion yamada “Estudio del desarrollo adulto”. Fue komenzada aze unos 80 anyos kon setesientos ombres. Mas después adjusto a la investigasion las esposas de los ke se kasaron, ansina komo a los ijos ke les vinieron.
Una de las konklusiones más importantes del estudio, fue publikada kon estas palavras: “Para tener una vida feliz es menester kultivar relasiones de pareja, amistad o de famiya”. Antes ke se diera a konoser este resultado, se pensaba ke para poder arivar a una bida plasentera avia ke ganar dinero, fama i poder.
Se demostró ke una vez solusionados los problemas de las demandas basikas, las personas, anke kontinuen a obtener dinero o lograr la fama, la felisidad no les puja, a la kontra, en algunos kasos mengua.
Kuando se dize ke kale kultivar relasiones, no se refiere tanto a la kantidad de eyas, sino a su kalidad. Las personas, al sentir apoyos inkondisionales de parte de los otros, se konsidera una ayuda para tener una mijor salud i en jeneral un bienestar más permanente.
El investigador kapo del estudio es el doktor i profesor Robert Waldinger de la eskola de medisina de Harvard. En una entrevista disho: “La mayor parte de la djente no tiene haber de los resultados de muestas peskisas, malgrado su publikasion en revistas akademikas”. Esta afirmasion era una kritika a los jurnales, por la mankura de yevar al publiko masivo, en palavras fasiles, los resultados de las investigasiones sientifikas i akademikas de las universidades.
Desde aze menos de vente anyos, la yamada sikolojia positiva se topa en la buskeda de akeyos faktores ke ayudan a las personas a tener una vida feliz. Lo tradicional, lo tipiko de la sikolojia, era estudiar la dolor, la anormalidad, las hazinuras de los pasientes. La pregunta ke kale lavorar, para deskuvrir si la persona se siente o no feliz, se puede enunsiar ansina: a kualo le da usted mayor importansia entre sus objektivos de bida? Si aresponde ke le interesa tener buenas relasiones kon otras personas, endemas en el propio entorno, o kon la natura, estaremos más siguros ke se va por un kamino de la felisidad. El doktor Waldinger komenta ke si la persona dize darle sentido a su bida solamente ganando dinero, alkanzando la fama o buskando la atraksion fisika, eso no da garantía de prokurar la felisidad.
Son las kondisiones positivas, komo la empatía, meterse en el lugar del otro, el karinyo, amor, las ke dan la oportunidad de tener una buena relasion kon los otros. En definitiva, lo ke se konsidera una konvivensia sana. Se trata de una armonía grupal, más ke aktos individuales. La djente, en jeneral, kontinua en un kamino de ver las relasiones umanas komo instrumentos o medios para alkanzar objektivos propios. Kuando se komprende ke tenemos menester del otro i ke podemos kontar kon él, es posible de obtener un kambio para mijorar mosotros.
Kon el paso del tiempo la vitalidad de las personas languidese, eskaye. Akontese una suerte de divorsio entre la evolusion mental del sujeto i su evolusion fisika. Montesquieu lo dezia kon estas palavras: “Apenas el espíritu esta arivando al punto de madurez, el puerpo komienza a debilitarse”.
Rita Levi-Montalcini
(Comune di Montalcini-Acqui Terme)Rita Levi-Montalcini, sientifika djudia italiana, Premio Nobel de Medisina en 1986, kuando kumplio los sien anyos, respondió ansina a una pregunta del jurnalista ke la entrevistava: “Kuando ya no pueda pensar, kiero ke me ayuden a morir kon dignidad”. Para eya lo importante era el optimismo ke la ayudava en los momentos difisiles. No le preokupava la enfermedad, la muerte, las persekusiones (fue viktima del fashismo); desia ke eso le afektava al puerpo pero no su mente. “El meoyo nunka debe pensionarse, kale ke lavore noche i dia, porke a la edad mia ya no es menester dormir, es pedrer el tiempo. Rekomiendo mantener el meoyo ilusionado, aktivo, ansina no se va a pedrer. Murio a los 103 anyos, el 30 de disembre 2012, soltera i siempre feminista. “Desidi no kasarme kuando era djoven, porke nunka avría obedesido a un ombre, komo lo azia mi madre a mi padre”.
Simone de Beauvoir
(Wikipedia)Lo akontesido kon esta mujer es un ezemplo para los aedados. Se trata de una aktitud, de elejir entre el optimismo i el pesimismo. Es posible akeyo? Simone de Beauvoir eskrivio en su livro “La vejez”, ke esta etapa representa para las mujeres una liberasion: toda la bida sometidas a sus maridos, konsagradas a los ijos, por fin pueden okuparse de eyas mismas.
Tal vez por simple azardo, el mismo anyo ke murió Rita Levi-Montalcini se empezó en los Estados Unidos “un elojio a la vejez”. La kasa de modas Lanvin presento una modelo de 82 anyos en un adjustado kostume vedre. El fotógrafo neoyorkino, Ari Seth Cohen, publiko el livro “Advanced Style”, ande amostra fotos de mujeres, muy aedadas, kon vestimentas ermozas i elegantes, pensadas para los inviernos de sus bidas. Endemas Cohen adjusto esta frase: “Kuando semos djovenes mos vestimos para los otros. Para la tresera edad kale vestirse para uno mismo”. Kon un sukseso impresionante, asta agora el livro tiene kuatro edisiones. El afamado jurnal de modas “GK” tiene una seksion yamada “El Ansiano Chic”.
Ilona Royce Smithkin at 96 (YouTube)
En You Tube es posible de ver a una mujer de noventa anyos, yamada Ilona Royce Smithkin, kon el kaveyo kolorado, meneándose alegremente en su apartamento kon fostanes i foulares muy yamativos. Las manos las tiene deformadas por la artritis, el bel enkorvado, los ojos kon kataratas. Una djoven eskrivio ansina, kuando vido el video: “Me dieron ganas de bivir por muncho tiempo, ama no ser djoven por siempre; lo digo esto para las madres ke se están inchendo la kara de botox, para amostrar menos arrugas ke la ija universitaria”.
La investigasion de Harvard, la egsperiensia de sien i tres anyos de Rita Levy-Montalcini, más lo ke amostran los medios de komunikasion de los aedados, mos yeva a tener una mirada optimista para le vejez. Akseptar ke el puerpo se debilita i ke muestro meoyo puede kontinuar aktivo. Si no ay lavoro, inventar proyektos ke le den sentido a los anyos ke restan por estar en la tierra. Djunto a lo anterior kultivar las buenas relasiones kon la famiya i los amigos.
Para eskapar, esto me lo konto un amigo, doktor de ojos: “Vino a verme una mujer kon lentes. Le demandí si tenía presbicia o miopía. Me arespondio: Tengo vejez doktor”.
1 Hernán Rodríguez Fisse was born in Santiago de Chile in 1950, his father being born in Edirne and his mother in Istanbul. Both families descend from Jews exiled from Spain in 1492. They emigrated to Chile in 1949. He has a degree in Public Administration from Universidad de Chile and a graduate degree in Journalism from Catholic University. He is a Master of Arts in Political Science and a Doctor in International Relations. He teaches international business and business negotiation and conflict resolution at the Universidad de Chile, Universidad de Santiago, and Universidad Federico Santa Maria. He is director and editor of the Art, Science and Literature magazine Zejel and a permanent collaborator of the magazines El Amaneser of Istanbul, Aki Yerushalayim of Israel, Foro of Mexico. He has been a leader of the Sephardic community of Santiago for the past thirty years and at present teaches ‘djudezmo’ to the members. He is also most recently the author of several books.